…*…ik Baar Kaho Tum Meri Ho - Ibn-e-Insha…*…

Hum ghoom chukay basti bun mai.N
Ik aas ki phaans liyay mun mai.N
Koi sajan ho koi piyara ho
Koi deepak ho koi tara ho
Jab jeevan raat andhairee ho
ik baar kaho tum meri ho

Jab sawan badal cha'ay hoon
Jab phagan phool khila'ay hoon
Jab chanda roop luTata ho
Jab sooraj dhoop nahata ho
Ya shaam nay bastee ghairee ho
ik baar kaho tum meri ho

Haan dil ka daman phaila hai
Kiyun goree ka dil maila hai
Hum kab tak peet kay dhokay mai.N
Tum kab tak door jharokay main
Kab deed say dil ko sairee ho
ik baar kaho tum meri ho

Kiya jhagra sood Khasaray ka
Yeh kaaj naheen banjaray ka
Sab sona ropa lay ja'ay
Sab duniya, duniya lay ja'ay
Tum aik mujhay buhtairee ho
ik baar kaho tum meri ho