Tuesday, December 7, 2010

…*…Ajab Pagal Si Larki Hai…*…

Ajab Pagal Si Larki Hai
Mujhe Har Khat Main Likhti Hai
“Mujhay Tum Yaad Kertay Ho?
Tumhain Main Yaad Aati Hoon?”
Meri Baatain Satati Hain
Meri Neendain Jagati Hain
Meri Aankhain Rulati Hain

December Ki Sunehri Dhoop Main Ab Bhi Tehaltay Ho?
Kisi Khamosh Rastay Se
Koi Awaz Aati Hai?
Thitharti Sard Raaton Main
Tum Ab Bhi Chhat Pe Jate Ho?
Falak K Sab Sitaron Ko
Meri Batain Sunatay Ho?
Kitabon Se Tumhare Ishq Main Koi Kami Ai?
Ya Meri Yaad Ki Shiddat Se Aankhon Main Nami Ai?

Jwaban Us Ko Likhta Hoon..
Meri Masrofiyat Dekho Subah Se Sham Office Main
Chiragh-E-Umer Jalta Hai
Phir Us K Baad Duniya Ki
Kae Majboriyan Pao`N Main Bairian Daal Rakhti Hain
Mujhay Bay-Fikr, Chahat Se Bharay Sapnay Nahin Dikhtay
Tehalnay, Jagnay, Ronay Ki Mohlat Hi Nahin Milti
Sitaron Se Mile Arsa Hua..Naraz Hon Shayd
Kitabon Se Shaghaf Mera Abi Waise Hi Qaym Hai
Farq Itna Para Hai Ab Unain Arsay Main Parhta Hoon
Tumhain Kis Ne Kaha Pagli Tumhain Main Yaad Karta Hoon

K Main Khud Ko Bhulanay Ki Musalsal Justajo Main Hoon
Tumhain Na Yaad Aane Ki Musalsal Justajoo Main Hoon
Mager Ye Justajo Meri Bohat Nakam Rehti Hai
Mere Din Rat Main Ab B Tumhari Sham Rehti Hai
Mere Lafzon Ki Har Mala Tumhare Naam Rehti Hai
Tumhain Kis Ne Kaha Pagli Tumhain Main Yaad Karta Hoon
Purani Baat Hai Jo Log Aksar Gungunatay Hain
Unhain Hum Yaad Kartay Hain Jine Hum Bhool Jatay Hain

Ajab Pagal Si Larki Hai
Meri masrofiyat Daikho
Tumhain Dil Se Bhulaon,To Tumhari Yaad Aaye Na
Tumhain Dil Se Bulanay Ki Mujhe Fursat Nahin Milti

Aur Iss Masrof Jevan Main
Tumahray Khat Ka Ik Jumla
“Tumhain Main Yaad Aati Hoon ?”

Meri Chahat Ki Shiddat Main Kami Hone Nahin Deta
Bohat Ratain Jagata Hai Mujhe Sonay Nahin Deta
So Agli Baar Apne Khat Main Ye Jumla Nahin Likhna

Ajab Pagal Si Larki Hai Mujhay Phir Bhi Ye Likhti Hai
Mujhay Tum Yaad Kartay Ho Tumhain Main Yaad Aati Hoon ?

No comments:

Post a Comment